4... Financial Position Statement

حبايبى الحلوين... اتاخرت عليكوا اعذرونى .صباح الورد 🌹
بوست رقم 4... هنبدا النهاردا فى عرض القوائم المالية
عندنا 5 قوائم مالية مش 6 ولا 7..هنقولهم حسب الترتيب
1.. Financial position Statement قائمة المركز المالى
دى اهم واحدة فيهم لأنها بتحتوى على معادلة المحاسبة 👌
Assets = Liabilities + owners Equity
هنا بتوصف التوازن الدقيق بين الاصول أو موارد الشركة حسب مصطلح جليم.. و الخصوم واللى ناس كتير ما تعرفوش أن الخصوم دى مش بس التزامات.. دى مجموع الالتزامات الخارجية( اللى على الشركة للناس اللى برة اللى مش هيستنوا عليك وعايزين فلوسهم أيا كان كسبت او خسرت) ... زائد مجموع الالتزامات الداخلية اللى عليا لأصحاب الشركة فاللى هو ممكن يصبروا علينا عادى لو مكسبناش.. دول حبايبنا اللى بتيجى عليهم ويشيلونا 😊
يبقى اتفقنا أن
Liabilities =Claims to outsiders =Debt financing
Equity =Claims to 7bybna 😉= Equity financing
طيب مجموع الاتنين مع بعض ممكن نسميهم الهيكل المالى
Assets (Resources)  أو أصول الشركة ومواردها
= Lblts +eqty(Capital structure) الهيكل المالى
طبعا الهيكل المالى دا يعنى الشركة بتجيب تمويلها ازاى 🤔
Lblts or Debt financing
يعنى راحت لحد من اللى مبيرحموش ومبيستناش على حقه
زى البنك مثلا و اخدت منه قرض بفوائد هتسددها اجبارى
Equity or equity financing
يعنى راحت تجيب تمويل من المساهمين أو دخلت ناس تشاركها فالربح...سميها زى ما انور بيقولك.التمويل بالحب😁
طيب رايك لو شركة احسن لها تمول بالحب ولا تمول بالديون
الاتنين ديون بس فلوسى أو  اخويا هيصبروا عليا عن الغريب
دا كدا يدخلنا ف معدل هتاخدوه ف بارت تو وبدرسه ف CPA حاليا اسمه
Debt to equity ratio =Debt /equity
كل ما الرقم دا يبقى اقل من الواحد يبقى كويس للشركة 😎
دى كانوا كلمتين بس تفتيح للشرح.. اصبر بس هظبطك 😉
نرجع للمركز المالى Financial position
يعنى القائمة اللى بتقول موقفى المالى حلو ولا ايام سودة😁
طيب مكتوب جنبها ميزانية عمومية Balance sheet
هو فى فرق 🤔.. اه طبعا بس مش هعمل حاجة مختلفة 😂
لو اى يوم ف السنة عملت موقف مالى للمديرين أو لاى غرض داخلى ف الشركة ف مازالت اسمها مركز مالى F position
لكن لو اخر السنة بصدر بقى الكلام دا للناس والمستثمرين يعنى يوم 31 ديسمبر...  هتبقى ميزانية عمومية B Sheet
خلاص كدا مبقاش مركز صغير دى بقت ميزانية اد الدنيا 😁
Reports amounts at moment of time
يعنى بتيجى يوم معين تاخد سكرين شوت للموقف المالى بتاعك... يعنى اى حاجة حصلت بعد ال اسكرين شوت دى مليش دعوة بيها.. انت متخيل 🤨.. دى اول عيب من عيوبها
 It helps users to assess liquidity, financial flexibility and  risk
بص كلام جليم رخم بس هو نفس الكلام اللى فوق دا بتاع انور الغلبان والله 😁.. اول حاجة liquidity
السيولة... دى بتبص على رقم الاصول أو الموارد اللى هنستخدمها لسداد الالتزامات اللى علينا بعد كام يوم 🤡.. يعنى مرتب الشهر وبحسب مواصلات. ايجار .. دى السيولة
Financial Felxibility المرونة المالية
يعنى انت مرن اد ايه تسدد التزاماتك و تجيب فلوس منين
ديبت ولا تميل على حبايبنا الاكويتى 🤗..
Risk الشركة خطر ولا أمان اديلها قرض أو تستثمر
طبعا كل ما رقم الالتزامات يبقى كبير خصوصا أكبر من حبايبنا يبقى الشركة خطر انك تعطيها قرض أو تستثمر.. روح سدد ديونك الأول 😂.. رقم المعدل اللى قلناه كدا أكبر من 1
الكلام اللى بعده دا اقراه ف الحلاوة عادى انت فاهمه كدا ✋
How entity deploys Resources to get return
يعنى اد ايه الشركة قادرة انها توظف مواردها تجيب لها عائد
طبعا تعريف #الاصول هى اى حاجة هتجيب لك منفعة مستقبلية.. خد بالك لو فهمتها كدا هترتاح.. وخد دى منى.. لما المنفعة تروح من الأصل بتتحول لمصروف وتفضل تصرف الأصل لحد ما يبقى صفر.. علشان كدا الأصل بيتحول مصروف اهلاك..طيب ادينى أمثلة يا عم انور 😘
المخزون.. مش دا هبيعه وهيجيبلى منفعة... يبقى اصل
أوراق القبض.. هتجيب لى منفعة بردو وهنحصل بيها 💵
#الالتزامات.. القسم اللى بيبقى فيه الديون بقى اللى بخلص عليها المنافع اللى معايا.. يعنى مش هتتدلع ببلاش 😂.. Their settlement result in outflow of benefit
طب ادينى مثال كمان والنبى يا ريس 😂..زى القروض
Loans payable, السندات , Bonds
#حقوق_الملكية دول بقى حقى انا و إخواتى ف الشركة
دا بقى اللى هيبقى بعد ما اسدد ديونى و اقسمه انا واخواتى
شفت الورث كدا... تسددوا دين المتوفى وبعدها نتخانق ع التركة بقى 🤩.. المنفعة المتبقية بعد سداد الالتزامات
Residual interest after subtracting liabilities
طبعا الرقم دا بيتغير بس بالعمليات التشغيلية للشركة كمان لو حد من الشركاء سحب من رصيده أو عمل تغيير فيه.. زى ايه
الاستثمارات فى الشركة Investment by owners
بمعنى إضافة شىء ذات قيمة للشركة... زى ايه.. تدخل بفلوس أو بضاعة أو خروفين نربيهم 😁.. اى شىء له قيمة
Transfers of something with value to increase ownership of interest
طيب حبايبنا مش هياخدوا حاجة.. ان كان حبيبك عسل😁
Distributions to owners
توزيعات ارباح بقى... مسحوبات... ياخد الخروفين تانى 😂
Dividends distributed,.... اى حاجة تقلل من فلوسه
..........................................
فى فرض عندنا كدا اسمه فرض الفترة المحاسبية
Accounting Period Assumption
بيخليك تقسم كل حساب اد ايه منه يخص السنة وتحطه ف جزء المتداول... و اد ايه لا يخص السنة ودا  غير متداول
Current assets.. اى اصل معاك المنفعة بتاعته السنة دى
Non current.. المنفعة بتاعته هتيجى بس بعد كذا سنة
طيب ادينى أمثلة يا ريس 😉...الفلوس.. دى اكتر حاجة ف الدنيا متداولة 😁.. كمان المخزون.. رايك دا هيتباع بعد سنة ولا أكثر... مفيش شركة عبيطة هتخزن مخزون لمدة كبيرة خصوصا.. طبعا لو مفيش احتكار.. دى حاجة استثنائية
Inventory generally classified as current
Accounts receivable
رايك حسابات أوراق القبض اللى على العملاء تيجى ايه🤔
الطبيعى العميل هيسدد خلال سنة.. طب هل مفيش أوراق قبض غير متداولة... اكيد فى عملاء كدا ممكن يقعدوا اكتر من سنة على ما يسددوا ومخدتش عليهم شيكات.. بالكلام كدا.. فطبيعى هيبقوا غير متداول... طب سؤال
لو اصل هيقعد 5 سنين اسحب منفعته... دا يتحط فين
متتسرعش وتقول Non current... انور هيقولك 😉
Current Assets الجزء بتاع السنة هيبقى
الجزء بتاع ال 4 سنين اللى بعدها non current
........... يبقى خدها قاعدة يا عم الناس.....
اى اصل متوقع استفيد منه أو تحوله فلوس ف مدة اقل من سنة أو خلال الدورة التشغيلية ايهما أكبر ... لان فى شركات دورتها التشغيلية أكبر من سنة.. المهم بيبقى current
Expected to be realized into cash within operating cycle or 1 year ايهما أكبر
....... كفاية كدا النهاردا و نكمل البوست الجاى بامر الله...
#CMA_As_Easy_Cake 🍞
By Anwer Shawky CMA, CPA in progress🍄

Deferrals الايراد الغير مكتسب و المصروف المقدم

دا بيحصل لما الدفع واستلام الخدمة ميبقوش ف فترة واحدة فميتحققش بالتالى مبدا المقابلة بس لازم تسجلهم
دول حاجة اسمها Deferrals
 بمعنى مؤجلات تقريبا بالعربى
الفكرة انك ف المحاسبة عندك اساسين واحد اسمه اساس نقدى والتانى أساس استحقاق.. طبعا المحاسبة بتشتغل (استحقاق) بمعنى.. بسجل الايراد سواء حصلت فلوس او محصلتش.. حد جاى يشترى منى بضاعة... دفع خير نسجل
DR / CASH
CR / SALES REVENUES
مدفعش خير برضو نسجل ايراد
Dr / AR.... Cr/ sales revenues
لكن لو شغال اساس نقدى ويبقى انا كدا فى وكالة او محل
مفيش حساب بقى اسمه عملاء.. ما انت بتعترف بس باللى. طلعته كاش 😊 فلو جالك حد اشترى ب 1000 ج منهم 500 كاش و 500 اجل هيبقى القيد بتاعك
DR/ CASH 500
CR/ SALES REVENUES 500
و ال500 الباقيين مش هسجلهم الا لما ييجى يدفع فلوس
طبعا دا هبد ملوش دعوة بالمحاسبة بس بوضحلك فكرة
المهم مش دا موضوعنا و اكيد انت عارفه بس هيفرق ف الشرح... انا بقى هقولك اجابة سؤالك
لو انا بقى جالى عميل و عايز بضاعة بس هيدفع فلوسها ومش هياخدها.. او هيدفع فلوسها مقدم يعني. زى شركات الاستثمار العقارى كدا ادفع مقدم كذا وقسط الباقى على كام سنة بدون فوائد.. وهو طبعا معلم عليك ف الثمن وواخد الفوايد بس اشطة مش دا موضوعنا بردو 😂
المهم ساعتها بقى رايك الفلوس دى هتقول للرجل ايه
خليها معاك لما تستلم الشقة ولا هاتها سلف لما تبقى تيجى تاخد الشقة ولا هتعمل ايه
مبدا الاعتراف بالايراد بيقولك اعترف بالايراد دا لما يحقق شرطين
REALIZED  يعنى اخدت فلوس البضاعة
EARNED يعنى سلمت البضاعة
طب هو ف المثال دا انهو شرط اتحقق
اكيد REALIZED.. انك اخدت فلوس الشقة.. لكن تانى شرط متحققش.. هل طبقا للمبدا تعترف بايراد.. قالك لأ
اومال اعمل ايه... قالك اثبت الفلوس اللى اخدتها و اثبت التزام عليك للرجل اللى دفع ولما تسلمه الشقة تقلل الالتزام دا
يبقى القيد هنا مثلا
Dr/ cash 5000
Cr/ liability ( un earned revenue) 5000
يعنى ايه بقى الكلمة دى.. يعنى ايراد زى ما انت عايز يا باشا بس غير ايرند.. غير مكتسب.. دا بنقول عليه حساب وسيط
طيب الرجل لو بيعمل حسابات هيسجل عنده ايه
هيسجل ان الخزنة قلت طبعا بالفلوس اللى طلعت 5000
والحساب اللى طلعت ادامه الفلوس اسمه ايه
طبعا مصروف... رايح اصرف و ابعزق ف شقة 😂.. بس خد بالك مش مصروف مستحق زى العادى دا لان المستحق دا يبقى مستحق عليك . دا اسمه مصروف مقدم
ليه بقى علشان الدفع سبق الخدمة فبقى المصروف مدفوع مقدم مش مستحق عليا.. خد بالك دا ف الاصول مش مصروف زى ما اتفقنا هو لسه مبقاش مصروف
ايوة يعنى م الاخر القيد عند الرجل ايه
Dr / prepaid expense 5000 (حساب اصول
Cr / cash 5000
طيب جه الرجل استلم الشقة بعد سنة مثلا... حلو
انا كدا حققت تانى شرط من شروط الاعتراف بالايراد
Realization
كدا بقى الايراد محقق ومكتسب والدنيا لوز
ناقص القيد.. اللى هو التسوية
طيب دا بيبقى ازاى
والله مثلا انا دفعت ال 5000 دول مثلا للرجل ايراد لخمس سنين.. فلو اتسجلوا ايراد ف سنة واحدة انا. ظلمت ال 4 التانيين.. فبسجل على اد اللى يخص السنة.. اللى هو 1000
يبقى اقلل الالتزام اللى عليا ب 5000 بقى خلاص بمقدار ال 1000 ويبقى لسه باقى عليا التزام ب 4000 بس وحققت ايراد السنة دى بألف... طيب بردو القيد ازاى
DR/ un earned revenue (liability) 1000
Cr/ revenue 1000 العادى بقى اللى بيروح قايمة الدخل
طيب كدا يبقى الالتزام اللى عليا كان 5000 قللته بألف السنة دى ولسه 4 للسنة الجاية... وافضل اعمل كدا كل سنة لحد ما اخلص ال 5 سنين بال 5000 بتوعنا
يبقى ملخص القيود
Dr Cash 5000 /Cr un earned revenue 5000
Year 1.. Dr un earned 1000 cr revenue 1000
Year 2.. Dr un earned 1000 cr revenue 1000
Year 3.. Dr un earned 1000 cr revenue 1000
Y 4.. Dr un earned 1000 cr revenue 1000
Y 5.. Dr un earned 1000 cr revenue 1000
يبقى كمجمل كدا لو بصيت ع القيود كلها وشطبت المدين والداين ولخصت الدنيا ف فردتين هيبقوا ايه
Dr cash 5000
Cr revenue 5000
وكانى سجلت الايراد من اول يوم بس على مراحل... بس كدا
لو وصلتك ممكن تقولى الحكاية دى بتتسجل ف المصروف المقدم ازاى عند الرجل اللى بيشترى مش الشركة بقى
Prepaid expense
Anwer Shawky CMA ابسطهالك

ايه الخطوات المطلوبة بعد التخرج علشان ابقى مؤهل لسوق العمل

                                                                    

                                                                            بسم الله الرحمن الرحيم 

هقولك على الطريق الاسهل للوصول لمرحلة انك تقعد فى انترفيو عارف قيمتك كمحاسب و تقييمك المادى المناسب

حديث تخرج .. الكلمة اللى بتحسسك لما تقرأها انك مفيش عندك اى خبرة فى الحياة مش المحاسبة بس . انك حد اتخرجت من معهد لاسكلى مش تجارة .. واللى لما بنقولها بتبقى ممزوجة باحساس الشفقة من المستوى الفكرى المهنى البسيط .. كل دا مش صح ولا أساس له من الواقع   انت  خريج كلية تجارة ودرست 4 سنين علشان لما تتخرج تشتغل مش تمتحن تانى ف نفس الكلام وبسبب خوفك انك تسقط ف الانترفيو او تنجح نجاح غير مرضى ليك ف بتطلب اى راتب تدارى بيه احساسك بالقصور ورغبتك فى تطويرالقصور دا.. طبعا فكرة مش صحيحة وهتعرف دا مع الوقت والخبرة وهتلاقى ناس بيشتغلوا معاك ف الشركة بيقبضوا أكتر  منك وفى مناصب أكبر منك برغم انك متميز فى شغلك عنهم لكن هم استغلوا مجهودك وعدم ثقتك فى نفسك واترقوا وانت مكانك لسه

طيب انت حمستنى وفعلا كلامك مقنع .. بس بردو مش عارف أبدأ منين ... أنا هديلك أمثلة

أول مثال .. انا حديث التخرج وحابب اشتغل ف البنوك

اول حاجة هتعمل سى فى منظم تحاول تحط فيه كل الكورسات اللى اخدتها والتدريبات والانشطة ف الكلية و اى حاجة تدل انك  شخص اجتماعى وسريع البديهة ولو لسه معملتش السى فى ممكن تدخل على المقال دا وتعرف ازاى تعمله

https://freecna.blogspot.com/2018/11/cv.html

ثانى خطوة تاخد كورسات متعلقة بالمجال زى المعهد المصرفى و ادارة البنوك و شهادة المصرفى المحترف و عمليا لو تعرف تتدرب ف فودافون او اتصالات لانها من الحاجات اللى بتعطى دفعة قوية للسى فى بتاعك ف البنك .. كمان ادخل على مواقع البنوك و حاول تقدم اونلاين وكمان تطبع السى فى وتقدمه بايدك للاتش ار ف البنك.. بلاش السيكيوريتى لأن غالبا بيترمى ... طيب ليه مش  هتخسر لما تدخل للاتش ار و تكون أخدت ميزة الانترفيو بدون ما تتحاسب على أخطائك 

ثانى مثال... انا حديث التخرج محتاج اشتغل ف مكاتب المراجعة

اول خظوة هتعمل اكونت على

Wuzzuf, linkedin, jobzella, bayt

 وهتبحث على شغل فى مكاتب المراجعة اللى تناسبك سواء

KPMG , Deloitte , Ernst & Young , PWC

أو لو حتى مكتب من المكاتب اللى لها اسم كبير فى السوق ... نصيحة بلاش مكتب الأستاذ محمد ولا أحمد للمحاسبة اللى محدش يعرفه الا فى الشارع بتاعهم لأن فى الغالب مش هتستفيد خبرة أصلا الا انك عرفت عنوان مصلحة  الضرايب و السجل المدنى وهتتبهدل فى مشاوير على الفاضى وهتضيع وقت ممكن تستغله احسن وبردو حابب تجرب براحتك

 :Dثالثا .. انا حديث التخرج وحابب اشتغل فى الشركات المالتى ناشيونال .. دى بقى بتاعتى

 طبعا الشركات دى بتحب المظاهر جدا ف اى حد خريج

Auc  Bue  Guc, Cic, Fue

 فرصته هتبقى كويسة جدا انه يتقبل لانهم بيهتموا باللغة جدا و دى عايزك تشتغل عليها علشان تنافسهم

Excel
طبعا لازم تتعلمه ويا ريت لو تتعلم من فيديوهات النت مش لازم سنتر كبير أو شهادة معتمدة من القنصلية الامريكية بكولالامبور او جامعة عين شمس اللى فى أمريكا و أى كلام بيتقال علشان يقلبوا فلوسكم لأن كل دا مش هينفعك مع أول سؤال اعملى كذا على الاكسيل عملى ومتعرفش .. ساعتها هتحس انك ضيعت فلوسك

 ((  pivot table , v look up , H Look up , Sum if , Count if ))

الحاجات دى كمان هتساعدك جدا و انت بتقدم على بوزيشن فى البداية زى

Junior financial analyst , Junior Financial Accountant , Junior Budgeting & Reporting Accountant

لأنك هتلاقى الامتحان النظرى بيسألك فيها فهتحس بقيمة كلامى لما تدخل وتحل الاسئلة بسهولة

المظهر المناسب : أد ايه بيفرق وانت فى الانترفيو رايح فورمال خاصة مع الاتش ار .. بيخليك تقدر تطلب مرتب كويس

رابعا : أنا مش حديث تخرج اوى يعنى أنا خريج 2015 ... كدا راحت عليا ولا ايه

اقدر أقولك حديث التخرج يعنى متوسط 5 سنين من السنة اللى احنا فيها ...خاصة فى القاهرة الموضوع بيبقى عادى طول ما انت محسس الانترفيوور انك الفترة دى مكنتش بتلعب وكنت بتطور نفسك للشركة المناسبة .. دا بس علشان متقلقش لكن علشان نبقى واقعيين مطالب انك تكون متميز عن اللى لسه متخرج سواء كان بكورسات أو بخبرة من أى نوع كانت أو حتى بالمظهر العام زى

أولا : لو هتقدم محاسب فى شركة ما حاول تطور نفسك بكورسات تقيلة نوعا ما .. انت عديت مرحلة انك تدخل بكورس

PFA , Quick books , Peach tree

انت المفروض تكون مميز عن اللى اخدهم من شهرين وبيقدم معاك .. لازم تدور على شهادة مهنية كويسة بحيث توضح انك لو اشتغت فى المكان هتضيف له أكتر من حديث التخرج وهتتعلم أسرع بوعى أكبر .. أيا كان مجالك

اللى اتكلمت عنه دا كان نظرة سريعة لخطوة انك تدخل الانترفيو ... المقال الجاى هتكلم عن ازاى تنجح فى الانترفيو باذن الله

لو لسه معملتش سى فى او عندك مشكلة فيه

 

                                             بسم الله الرحمن الرحيم

ف الاول حابب اعرفك ان الموضوع مش معقد زى ما انت متخيل

ولا ان هتترفض لو السى فى بتاعك مش بروفيشنال او كتبت جزء الانشطة قبل جزء المهارات

فى المقال دا هعرفك ايه اللى تعمله علشان توصل لسى فى كويس طبعا مش الافضل ولكنه هيكون منظم لأى حد ف هيقراه وكمان هقولك على النصايح اللى تعملها علشان متقعش ف الاخطاء الكبيرة

 اللى فعلا ممكن تخلى الاتش ار ميكملش ال سى فى بتاعك حتى لو انت مؤهل للوظيفة 

ثانيا حابب اعرفك معلومتين مهمين جدا.. الاتش ار عامل زى مصحح الثانوية العامة بيبقى معاه كم كبير من المتقدمين ومفيش عنده وقت انه يبص على السى فى بالنظرة اللى انت متخيلها من اول مرة وبعض الدراسات استنتجت انه بياخد حوالى 35 ثانية فى النظرة الاولى للسيرة الذاتية علشان يختار هيتستحق انه يبقى من ضمن الاختيارات للوظيفة المطلوبة او لا 

حاول متخليش السى فى غير جاذب للانتباه او ممل لدرجة تخليه يعديه

كمان خد بالك انه بيبص نظرة عامة على 3 اماكن فى السى فى.. البيانات و المؤهل والخبرات.. الباقى مع اهميته لكنه بيبقى مكمل للى انا قلته لان دول هم اللى بيشكلوا الوظيفة 

اصلا فلو مش مرتبطين بها مش هيفرق الباقى

طيب يعنى اكتب ايه       

                                  أولا البيانات الشخصية

 Personal information

(Name, full address, date of birth, marital status, military status)

......... 

ثانيا.. الهدف من السى فى .. انت بتعمله ليه

Objective

طبعا احنا بننقل الكلمتين المحفوظين دول اللى هو حابب اشتغل ف المجال وحابب اطور نفسى و احقق طموحى والكلام الجميل دا كله 😊.. ربنا يكرمنا ان شاء الله

طبعا هتلاقى كل دا مكتوب ف لينك السى فى بتاعى ف الاخر لكن بقولك كدا علشان لو سألك ف اللى انت كاتبه تبقى واخد بالك ايه الكلمتين اللى شكلهم حلو ف الاول دول

........ 

ثالثا المؤهلات الدراسية

Education or qualifications

اسم الجامعة .. الكلية.. سنة التخرج.. التقدير ولو مقبول متكتبش.. لو فى مشروع تخرج اكتبه.. لو فى ماجستير او دكتوراة هتتكتب قبل البكالريوس طبعا.. يعنى بالترتيب من الاهم للاقل.. حتى اللى بيحضر ماجستير بردو اكتبه

اللغة ممكن تكتبها هنا وممكن تحطها ف سكشن لوحدها وحاول متكدبش . قول مستواك الحقيقى ف اللغة

........ 

رابعا الخبرات المهنية

Work Experience

و دى اهم جزئية ممكن يبص عليها الاتش ار ان مكنتش اول حاجة ويا ريت تكتب فيها كل الخبرات اللى عندك

يا ريت لو تكتبهم من الاحدث للاقدم وتكون موضح التاريخ ومدة العمل ولو انت حديث تخرج اكتب اى مجال اشتغلت فيه قبل كدا حتى لو مختلف عن اللى بتقدم عليه المهم توصل للى يقرأ انك احتكيت بسوق العمل.. كمان لو تشرح كل وظيفة كان ايه المسمى الوظيفى والدور اللى بتعمله او زى ما بنقول

Job description

حاول متكدبش لان هيسالك على اللى كتبته كمان هتكتب ارقام ناس اشتغلت معاك هم اه مبيتصلوش لكن ساعات بيتصلوا لو حسوا انك بتكدب او ع الاقل هيبحثوا بالاسم ع النت ويتاكدوا انك مش كاتب اسم واحد صاحبك

........... 

خامسا الكورسات او التعليم الذاتى

Courses and professional certificates

و دى بتبقى فرصتك انك تثبت للشركة انك بتشتغل على نفسك و ان طموحك مالوش حدود و ان هتضيف للشركة لو قبلتك و كمان ميزة عن زملاءك اللى بيقدمزا بنفس المؤهلات اللى فوق بالظبط.. فممكن الجزء دا هو اللى يميزك

.......... 

سادسا.. الخصائص الشخصية او السمات الشخصية

Skills and characterisitics

و دى اختيارية ممكن متكتبهاش اصلا لكن لو حابب تزود ليها مكان مفيش مشكلة

اتكلم عن شخصيتك ومميزاتها وحاول متكدبش لان هيسالك لو اتش ار رخم شوية وهيقولك مميزاتك ايه وعيوبك.. حاول تنقى مميزات عامة وتبعد عن الافورة.. يعنى هادىء ملتزم اجتماعى محب للعمل... نصيحة ابعد عن

Work under pressure

علشان هتتفحت شغل 😂.. خليك ف

Responsible, can complete tasks well

اخيرا بتكتب كلمة تدل ان اللى فوق دا مكدبتش فيه و انك واثق ان لو سالتوا عنى اى حد هيقولكم نفس الكلام

Reference available under request

ولو انت حابب تزود التاكيد اوى ممكن تكتب ارقام المدير بتاعك او اى حد كان شغال معاك سابقا

متقلقش هتاخد فورم بتاعتى تعدل عليها والله مش هسيبك  تجود.. بس بفهمك الدنيا ف الاول

........

النصائح بتاعتى علشان متغلطش خطأ من اللى لما بيشوفهم  الاتش ار مش بيكمل السى فى اصلا

اولا حاول يبقى السى فى صفحة واحدة بالذات لو انت حديث تخرج متكتبش كلام كتير مالوش لازمة

ثانيا.. افتكر دايما ان السى فى يكون منظم وحط نفسك مكان الاتش ار لو جايلك السى فى دا هتقبله ولا لأ

ثالثا.. حاول ميكونش ملون اوى ولا  لون واحد.. لونين كويس و يا ريت لو تخلى المزايا او الكورسات المهمة او الكلام اللى حابب توضحه للاتش آر يكون بخط اكبر وأوضح... بس يكون الشكل العام منسق بردو

الجرامر الجرامر الجرامر.. حاول متكونش كاتب ف الكورسات او المزايا انك ممتاز ف اللغة وتغلط ف الجرامر وحتى لو مش كاتب بردو يكون كلامك مختصر ومتكونش غلطان ف كلمة علشان دا من الحاجات اللى بتدى انطباع سىء

رابعا.. حاول دايما يكون فى فواصل أو ارقام وشكل كويس للنقط اللى بتتكلم فيها

خامسا.. لازم تعمل تحديث كل فترة للخبرات و ارقام الموبايل و اى حاجة ممكن تكون اتغيرت فى السى فى وتأثر عليه

اخيرا.. دا السى فى بتاعى واللى مش حاجة واو ولا حاجة ولكنه تعديل لسى فى مدير مالى صديقى والحمد لله بتقبل لحد النهاردا بيه عادى... ممكن تعدل عليه او ممكن تكتب انت حاجة جديدة بنفس النمط اللى وضحته لك ف المقال

نصيحة خلى فكرة السى فى الجاهز دى اخر حاجة تلجأ لها

افتكر دايما ان السى فى دا منظرك ادام الشركة اللى مش عارفاك
دا لينك السى فى بتاعى
https://docs.google.com/document/d/1dIMG1fWBuPNud651rNKX3fRqRxBVdpAS5TtKevJOCu8/edit?usp=drivesdk&ouid=117895577184913492512

 لو عايز تقيم السى فى بتاعك اكتب كومنت ف اخر
المقال و انا هبعته لاتش ار صاحبى يقيمه لك
اشوفكم المقالات الجاية . شكرا

هل السى ام ايه هتفيدنى ولا ملهاش لازمة

                                  بسم الله الرحمن الرحيم    
                                             
يمكن المقال دا مش هتلاقى حد يتكلم فيه بحيادية معاك كدا تانى فيا ريت تركز شوية فى الكلام اللى هقوله
هنا أنا حابب أتكلم معاكم عن شهادة انتشرت جدا اخر سنتين وسمعنا اسمها كتير ألا وهى
(((     CMA      )))                                                             
 فى ناس بتقول انها هتشغلنا تانى يوم ومبالغ كبيرة وناس بتقول انها ملهاش لازمة .. حابين نعرف بحيادية ايه هى الاستفادة من انى أدفع وقت ومجهود فى شهادة زى دى .. انا محتار ومحتاج حد يوجهنى أعمل ايه
هنا أنا هقولك كل حاجة محتاجها علشان محدش يستغلك فى فلوس بدون خدمة ولا فى وقت ممكن تستغله أحسن
أحب أعرفك بيا الأول
Anwer Shawky , CMA Holder
CMA instructor at Mentor for development and training
Senior Cost Accountant and Analyst at international Company
Previous Budgeting and Reporting at Multinational Company
Previous Branch Accountant at Small Company in FMCG
Previous Cost Accountant at Small Logistics Company
عندى 26 سنة بس خريح 2013 .. تقريبا معرفتش أوصل بسرعة لمكان نوعا ما كويس الا بحاجة غير تقليدية وهى دى مقالنا النهاردا

أولا : الشهادة هى اختصار لإيه :
Certified Management Accountant ( CMA )
يعنى محاسب ادارى معتمد فلو انت مش محاسب أو خريج كلية تجارة على الأقل فبلاش تكمل المقال
طبعا هنشرح كل كلمة منهم كمان شوية لكن فى الأول حابب أقول ان فى فرق بين الشهادات المهنية والأكاديمية
الأكاديمية : زى البكالريوس والماجستير والدكتوراة و دى شهادات محترمة جدا ولكن مجالها الجامعات والتدريس وليس سوق العمل
( Bsc , Masters Degree , PHD (
المهنية : دى الشهادات اللى بتهتم بسوق العمل والخبرة العملية والتطوير فى مجال العمل والمناصب الوظيفية وشهادتنا واحدة منهم
أول  كلمة فى الاختصار هى
Certified
معناها معتمد .. طيب معتمد من مين (من سنتر معين ولا من الجامعة الامريكية ولا من وزارة الخارجية زى ما بنشوف فى الاعلانات )
لأ الشهادة دى معتمدة من أكبر معهد للمحاسبين الاداريين فى العالم و دا مقره فى أمريكا ولاية نيوجيرسى
ودا لينك للمعهد لو حابب تعرفه أكتر وهتحتاجه لو نويت تسجل كعضو فيما بعد
https://www.imanet.org/?ssopc=1
تانى وتالت كلمة معناهم محاسب ادارى
Management Accountant   
و دا نوع من المحاسبة ببقى مختص فى تقارير قرارات متعلقة بالادراة العليا فى الشركات علشان كدا مجال مختلف ولازم تكون متميز علشان تدخله لأنك بتبقى فى اتصال مباشر مع المديرين أكتر من المحاسب المالى  أو أى محاسب بعيد عن دائرة اتخاذ القرارات
طيب تمام انا فهمت الاسم معناه ايه ومين المعتمد ليها فى العالم هل معنى دا انى لازم أسافر أمريكا علشان أخدها وهل كمان الشهادة مقتصرة على المحاسبين الاداريين فقط ... أنا هقولك لأ طبعا المعهد عمل حسابه ان فى ناس من جميع أنحاء العالم هتاخد الشهادة دى فبالتالى مش هيقدروا ييجوا من الصين و كندا ومصر والهند علشان يدرسوا ف أمريكا  فعملوا مقرات معتمدة لهم فى جميع البلاد دى بتدفع مصاريف الدراسة أونلاين وتاخد الماتيريال أونلاين وتمتحن أونلاين بردو وعلشان يضمنوا ان مفيش تزوير خصصوا مكان واحد فقط وهو( الاميدست)
ومتابعينه بكاميرات مراقبة ومعينين استاف كامل لمتابعة الالتزام الكامل للقواعد بتاعتهم علشان كدا مفيش فيها انك تدفع رشوة وتاخدها
ثانيا : مين اللى يقدر يستفيد من الشهادة دى فى مجاله ومين مش هتفيده
قبل ما جاوبك على السؤال دا : هل لو قلتلك ان فى كورس فى الطب بيعلمك ازاى تعمل اسعافات اولية هيفيدك ف شغلك كمحاسب
طبعا من غير تفكير هتقولى لأ لكن دا مش هيقلل من قيمة الكورس ولا قيمة الطب ولا قيمة الكورس للطبيب .. دى الفكرة
الشهادة مهمة جدا للمحاسبين اللى فى دائرة صنع القرارو اللى بيشتغلوا فى شركات تقدر الشهادة وتستخدمها فى تطوير الشركة
يعنى مش هتفيد أوى محاسب فى مصنع راس ماله 30000 ج صاحب المصنع مش مقدر يعنى ايه أعمل موازنة للسنة الجاية وبيقولك يا عم سيبها لله ما هى الدنيا ماشية حلو دا مش معناه ان ممكن يكون فى مصنع او شركة بنفس راس المال او اقل لكن مديره فاهم وحابب يزود نسبة مشاركته ف الماركت فهيستثمر فى محاسب يعمل دا  .. هى دى الفكرة اللى حابب أوصلها
أجاوبك بقى على السؤال : اللى هيستفيد من الشهادة دى أو هيستخدمها هم:
1_ المدير التنفيذى للشركة / المدير المالى / مدير الحسبات /المراقب المالى
CEO/ CFO/ Accounting manager/ Financial Controller
2_ مدير المبيعات/ المخازن/ المشتريات / الخزينة أو التدفقات النقدية بصفة عامة / مدير قسم الموازنات /مدير المراجعة
Auditing Manager/ Budgeting and Reporting / Cash flow Section Head / Purchases / Sales Managers
3_ المحلل المالى / محلل السوق / البورصة /الاقتصاد  وكل ما يتعلق بالمال وكيفية تدويره واستغلاله الأمثل
Financial Analyst / Business Analyst / Stock Exchange Analyst / Economic Analyst  
4_ محاسب التكاليف والمخازن ودا من أهم الناس اللى بتهتم بالشهادة دى لأنها متعلقة بيها جدا / محاسب العملاء /الموردين
Cost and Inventory Accountant _ A/P accountant _ A/R Accountant
5 _ البنوك : فقط المحلل المالى و ادارة المحافظ النقدية و المحلل الاقتصادى للسوق
و كل من يتعلق مهامه الوظيفية بالتحليل واتخاذ القرارات
اما التلر وخدمة العملاء فمش هتفيده أوى فى شغله ممكن تفيده كاضافة ليه لكن منصحش بيها فى كورسات احسن فى مجاله
 Teller _ sales Agent _ Customer Service _ treasury

طيب هل مجال البنوك أحسن ولا اشتغل فى شركات او مكتب مراجعة أحسن
بص كل مجال ليه مميزات وعيوب فانت حابب تشتغل فى ايه
مقرر بنوك ادخل المجال هتاخد فلوس كويسة ثابتة برستيج لكن ضغط شغل التزام مواعيد روتين
مكاتب مراجعة : مرتب ضعيف فى الاول وبهدلة على ما تتعلم لكن خبرة كويسة جدا جدا هتتعامل مع كل الحسابات والقوايم وهتدخل شركات كبيرة مرتاح لأنك فاهم  كويس .. لو مفيش دا فى مكتبك حاليا بلاش ادخل شركات علطول
شركات : طبعا الشغل الخاص مقرف ومش مستقر وبتترقى بالشغل بس أو بالواسطة أيهما أقرب ههه
لكن بالاجتهاد وتطوير نفسك هتترقى فعلا وهيزيد مرتبك وأنصحك متطولش فى مكان اكتر من سنتين أو تلاتة علشان مش هتزيد زى ما انت عايز ومش هتبقى فى منصب كويس الا لو عملت كدا ومش هتبقى ملم بمعظم المجالات الا كدا .. دا رأيى خطأ يحتمل الصواب

طيب انا تجارة عربى واللغة مش كويسة هل ينفع أبدأ ولا محتاج كورس انجليزى
اولا انت قررت ان هينطبق عليك الكلام اللى فات كله ( المجال _ التعليمات _ الفائدة )
تمام .. اقدر أقولك اه طبعا تقدر ومش محتاج كورس ولا حاجة اكتر من انك تحدد انت ضعيف لدرجة أد ايه
يعنى اللغة : مش هتحتاج جرامر يعنى لكن على الاقٌل تكون عارف ترجمة المصطلحات وازاى تعبر عن فهمك للاجابة بالانجليزى   
الماتيريال : انك تكون عارف على الاٌل أساسيات المحاسبة لأأن الشهادة دى مش هتبدأ معاك من الصفر زى ما قلنا هى بتستهدف مستوى معين من المحاسبين فالمفروض انهم على قدر من الفهم بأساسيات ومعايير المحاسبة
ثالثا : الوقت .. هتفرق بس فى الوقت اللى هتستخدمه انك تترجم المادة وتبقى زيك زى اللى درسها بالانجلش بل أحسن باذن الله
نصيحتى علشان تقدر تحدد دا : هات قاموس للمصطلحات و امشى بعينك كدا وانت تعرف انت بعيد أد ايه عن الكلام دا
كمان عايزك تعرف ان كل حاجة فى الدنيا ممارسة حتى اللغة فلما هتقرأ الكلمة مرة واتنين اكيد هتتعود عليها ويمكن تنساها بالعربى
أهم حاجة تكون الشهادة بالنسبة ليك اضافة فى المهنة مش علشان بس تشتغل بيها فى أى مكان أو مجرد ميزة لدخول سوق العمل
هى شهادة أعلى من كدا بكتير فيا ريت تدرسها بالمبدأ دا علشان متتعبش وتبقى عارف انك بتطور نفسك علميا قبل ما يكون ماديا

كلمتين فى الاخر  
الشهادة شهادة مهنية و دولية ومعترف بيها فى العالم كله فمش سيادتك اللى هتيجى تقلل منها لمجرد انك سمعت كلمتين أو حاولت تاخدها ومقدرتش ... عددها على مستوى العالم كله حوالى 60 الف واحد ... يعنى أقل من عدد محافظة فى مصر ودا بيدل انها شهادة مش سهلة ومتميزة ولسه مبقتش ولا هتبقى زى الشهادات العادية لأنها فى تطوير دائم وكلمة منى أطن انها هتبقى مطلوبة بالاسم بعد كدا فى الشركات الكبيرة والمناصب العليا وهتلاقى المتطلبات فيها :
CMA is Must

اخيرا : الشهادة فرقت معاك ازاى : ( دى تجربة شخصية لو مش حابب تقرأها لك الحرية طبعا )  
اكيد زى ما قلت لك فوق انا حد اخد الشهادة وهو عنده 24 سنة و 8 شهور وصل لمنصب كويس نوعا ما بالنسبة لسنى حاليا 26 سنة والحمد لله ماديا بردو فى فرق عن زمايلى اللى فى نفس المستوى المهنى لكن دا مش معناه انك هتاخد الشهادة بعدها هتقبض بالدولار
زى ما قلنا هى مش عصا سحرية ولا حاجة ... كلها فى الاخر ارزاق فى ناس بتاخدها ومش بتعرف توظفها صح فبتحبط
هى بالظبط عاملة زى عربية فيرارى : لو بتعرف تسوق كويس هتبقى معاك جناحين تقدر تطير بيهم لكن لو مش بتعرف تسوق أصلا مش هتفرق معاك العربية الفيرارى وهتقول انى راكب عربية ملهاش لازمة .. دا عيبنا كلنا كمصريين يعنى مبحبش نطلع مقصرين
كمان اللى بيقولك هتاخد بيها 50 الف شهريا دا مش كداب لكنه بيصدر لك النص الكويس فقط لكن مبيقولش مثلا ان الشخص نفسه شغال اصلا مدير مالى وراتبه بالطبيعة عالى لكنه زاد لما اخد الشهادة لأنه استخدمها فى اضافة قيمة اكبر للشركة


لحد كدا خلصنا المقال بتاعنا واللى منكم قرر انه مناسب يبدأ الشهادة ويذاكرها يستنى المقال الجاى علشان هنتكلم فيه عن حاجات مهمة
زى ( أبدأ ازاى _ أذاكر لوحدى ولا ف سنتر _ التكلفة وهدفعها مرة واحدة ولا تقسيط هههه _ ايه الفائدة اللى أقدر أحصل عليها لو درست بدون الشهادة  )

انتظرونا فى مقالات أكتر عن الشهادة وكمان مقالات خاصة بكلية تجارة .... شكرا